ع . ر . ف

ساعات تقابل واحد تعرفو ، وانتي في الحقيقة ما تعرفوش . وساعات تقابل واحد ما تعرفوش وتطلع تعرفو . آما المشكل في الناس اللي تعرفهم وانتي عمرك ما قابلتهم ، والا زادة الناس اللي يعرفوك وما تعرفهمش وكي تقابلهم يقولولك : تي نعرفك إنتي ! موش إنتي هوا... وفي للخر يطلع غالط فيك ماشي في بالو يعرفك وهو ما يعرفكش .

الحاصل كيما يقولوها معرفتك في الناس كنوز ، هاذاكة علاش ماذا بيك تعرف الناس . آما رد بالك تحاول تتعرّف عليهم ، عخاطر فرق بين واحد تعرفو وواحد تتعرّف عليه . أو بالأحرى وحدة تتعرّف عليها لأنو الفارب هاذا معروف باستعمالاتو المخصصة للتعارف بين الجنسين . . وفي الوضعيات هاذي جملة من نوع : "نجم نتعرّف عليك ؟" تنجم توصلك لـ"هات بطاقة التعريف" وترصيلك مبعد في اعترافات تصححها عليها بالتعريف بالإمضا . . عاد آش موصلنا أحنا لها المواصل ؟ ماو نكتفيو بحصة التعارف ونروحوا عأرواحنا .

آنا واحد مالناس ديما نسل روحي جوست بعد حصة التعارف . يا خويا شكون يعرف ؟ علموني نرد بالي مالناس اللي نعرفهم واللي ما نعرفهمش . آما اللي يخوفو بالحق هوما الناس اللي عندهم المعارف . هاذوكم ربي ما يعرفوهوش ! ماذابيه الواحد لا يعرفهم لا يدور بساحتهم

تمشيش تقولو عامل فيها عرّيف وهو ما عارف شي ؟ آنا راني نعرفكم تحكيو عللي تعرفوه واللي ما تعرفوهش . اعملو علي معروف خليوني نمشي ، هاو عرفي يعيطلي .